إجتماع أمين عام حكومة ولاية كسلا

 

كتبت (مروة عبد الله البشير) جزاكم الله كل خير على الدعوات ربنا يتقبل منكم ويبارك في حياتكم ويكرمكم ف الدارين يارب،  كتبت البوست التحت وكلي امل و رجاء بالدعوات لوالدي أن يتحقق شفاهُ وترجع عافيته لكن قضى الله امره.

وقد وصلني خبر وفاة والدي بعد دقائق من كتابة البوست الحمدلله على قضائه وقدره، ربنا اراد ان يكون البوست سبب في دعوات ليه في اكتر لحظة الانسان محتاج فيها للدعوات.

واضافت (مروة) سبب كتابتي للبوست انه منذ دخول والدي العناية يوم 16 نوفمبر  كانت هبة اختي التي ظلت ملازمة له طيلة ال 13 يوما التي قضاها في العناية تطمئننا على صحته.

وأحيانا وبشكل مفاجىء ترسل لنا بان الوالد (تعبان) ادعو له، وظللنا  نلازم القيام والدعاء والصدقة، إلى أن تخبرنا بتحسن حالته، واستقرار  وضعه والآن يتناول طعامه، حتى بعدها نستطيع أن نشم الهواء ونشغر بأن الروح قد عادت في أجسادنا.

وتضيف (مروة) في يوم الجمعة الماضي اتفقنا ان نلزم الدعاء (كل زول من مكانه) في وقت الاجابة من صلاة العصر لصلاة المغرب وفعلاً ظلينا ساجدين ندعو الله ان يتجاوز هذه المرحلة الحرجة والتي  (كان قد تعب فيها جدا ليلة الخميس وفي صباح الخميس ما كان في طريقة غير انو ينوموهو ويركبو ليهو انبوب التنفس) .

وتابعت قائلة بعد المغرب انا ومنى ولبنى ذهبنا إلى المستشفى التقينا باخواننا المرابطين صباح ومساء خارج سور المستشفى والحمدلله ربنا اكرمنا ودخلنا للوالد وقرأنا له سورة البقرة وحصناه واستودعناه الله.

تضيف: كان عندنا شعور بالاطمئنان انُه سيتخطى هذه المرحلة ويصبح معافا، عدنا إلى  البيت و كلنا امل وتفاؤل.

في منتصف الليل سألت هبة؛ عن  وضع والدي، جاء ردها (يا مروة الوضع صعب شديد شديد ما عارفة اقول ليك شنو لكن بس كترو الدعوات شديد). في هذه اللحظة شعرت بأن جسمي قد تحول إلى كتلة من التلج حرفياً.

أصبحت أفكر كيف ممكن دعاء شخص بظهر الغيب مستجاب،  كتبت بوست على صفحتي،  ( وانا ما شايفه وعيوني مليانة دموع ما عارفة بكتب صح ولا غلط وبفكر اكيد ربنا سيرينا معجزات قدرته في شفاء ابوي ابوي هيبقى كويس وسيُفرج عنه طوالي وهيجينا داخل البيت ونفرح بيهُ شديد انتهيت من كتابة البوست ختيت التلفون وقفت عشان اصلي وادعي وصلتني مسج من محمد البركة فيكم في ابوي).

واضافت (مروة) عزاءنا يا ابوي انك مشيت لي الكريم انو الله اختارك الى جواره لا ظلم لا الم لا مرض ان كل البواسينا وبعرفك بقول لينا اكاد اقسم ليكم يا بناتي ابوكم ده في الفردوس الاعلى، رجانا يا ابوي نحصلك قريب لأنو الدنيا الكعبة دي ما بتتعاش من غير طيبتك وضحكتك وحبك وبشاشتك.

وتابعت: راضون بقضاء الكريم ومؤمنين تمام الإيمان؛ إنُّ كل الحصل مسطر ومكتوب وما كان في طريقة ولا كان في وسيلة يتغير منه شي لأن قضاء ربنا نافذ(اينما تكونوا يدرككم الموت ولو كنتم في بروج مشيدة) ميقنين ان قضاء ربنا كلو خير وخير كتيير لي ابوي.

مضيفة: لكن ده ما يمنع اني حابه اقول لي كل الخلو اخواني بالاخص احمد اخوي جاري جري الوحوش ما خلا باب ما طرقو ما خلا زول ما وصل ليو خطاب بوضع ابوي الصحي ما خلا طريق الا وسلكو وطلع في الاخر ساكي السراب ببرود جميع المسؤولين القابلو خطاباتو يا بالرفض يا بالصمت فانا بسأل الله واعز عليه في السؤال بدءاً من البرهان مروراً بحمدوك وحميدتي وياسر العطا.

وسأقف عند  ياسر العطا ولجنته دي شوية ياسر العطا وصلو خطاب يوم الاتنين بوضِّح حالة ابوي المرضية وضرورة بدء علاجه باسرع وقت ما كان من ياسر العطا ولجنة ازالة التمكين الا نزع بيتنا في مؤتمر الكذب والتدليس يوم الخميس بعد ثلاتة أيام بالضبط نزعو بيتنا الظلَّ ابوي من 2005 يبني فيه طوبة طوبة وكل فترة يزيدو شوية.

وقالت مروة (البشوف بيتنا بلاحظ الطابق الفوق لسه ما مكتمل وما مضروب بوهية والمتعود كان يجينا بلاحظ كان وجود طوب وتراب طول الوقت قدام بيتنا اتسهلت بواصلو الشغل ما اتسهلت بقيف) نزعو بيتنا الساكنين فيه احنا كلنا اولادو السبعة بي اسرنا ما كان من (وجدي صالح) الممثل البارع الذي ضل طريقه الى المحاماة ومن ثم الى سرقة شقى الناس بالكذب وتدليس الحقائق ان يوحي لي الناس انو كل زول فينا من اولاد عبدالله البشير عندو ارض براو في حين انو ياهو بيتنا دة مكتوب بي اسمنا كلنا ابوي وامي واحنا يعني كل زول فينا بطلع بي كم متر وبالرغم من انو ما نزعوا غير بيوت اعمامي الساكنين فيها برضو بي اولادهم واسرهم ما كان منو الا يقول حي كامل حقهم.

واضافت المضحك المبكي انو الموضوع ما وقف هنا ابوي شال تلفون اخوي المرافق له واتصل بالدكتور عبدالله العطا قائد السلاح الطبي حالياً (ولد عم ياسر العطا) كان زميل ابوي اشتغلو سنين سوا في السلاح الطبي) المهم اتصل على دكتور عبدالله العطا معاتباً يا عبدالله معقولة ملفي الصحي يصل ياسر العطا الاتنين يقوم ينزع بيتي وبيت اولادي الخميس ده كلام شنو!! ما كان منهم الا ان يجعلوا من اتصال ابوي جريمة كيف يدخل له تلفون.

وتابعت: جاءت الاستخبارات العسكرية فتشت و أدو تعليمات لي الضباط والعساكر انو ما يدخل تلفون جوة؛ واحنا داخلين لي ابوي لازم نخت تلفوناتنا برة وحتى اخواني القاعدين طول اليوم مع ابوي يختو تلفونهم برة وفضلت الاستخبارات العسكرية تنط لي ابوي كل فترة والتانية عشان تفتش لو في تلفون في الاوضة وقدر ما طلب ابوي انو مرة مرة يخلو يضرب قدامهم لي اخواتو يضرب لي بعض من اهلو يطمئنهم عليهو رفضو (طبعاً ابوي مسموح ليو بي زيارة الاقارب من الدرجة الاولى سبحان الله الاخوان طلعو ما درجة اولى طلعت الدرجة الاولى شاملة الاولاد والزوجة فقط) .

ظل  التلفون هاجسا عند العساكر والضباط حتى وابوي بين الحياة والموت ظلوا يترددوا عليه جوة العناية ويصروا يفتحو الستارة البتمنحو بعض الخصوصية اصرو ان تظل مفتوحة عشان يتأكدوا من عدم وجود تلفون جوار والدي.

ودعت (مروة) على جميع من تسبب في ظلم والدها

داعية الله أن يرزقه جنةً عرضها السموات والارض لا يظمأ فيها ابداً ولا يشقى.